2016.05.02(一)~DAY2~全家HEA住遊濟州7天の旅
早餐 : 美麗渡假村內
小食: Jimmys(지미스) - 牛島花生雪糕
午餐：풍원 (漢拏山炒飯)
晚餐：제주갈국수(食辛辣海鮮鍋)
COFFEE TIME: 시와나그네
景點:
牛島-牛島峰
牛島-東岸鯨窟
牛島-北面燈塔
牛島-西濱白沙
城山日出峰
濟洲東部
住: 美麗渡假村(Areumdaun Resort)
* * * * * * * * * * * * * * *
Hi Morning!!! 今日朝早好早起左身, 6點零鐘, 啲電子器材都要食早餐~
7點半早餐時間開始, 於是落左去大堂度食, 呢個鐘數冇乜人。
悠閒地歎個早餐, 望住出面個景, 幾舒服。
呢間酒店其實類似啲APARTMENT, 你睇停車場都望到我地間房。
太陽開始少少蒲頭, 希望天晴啦
喺房既露台望到城山日出峰。
日頭既美麗渡假村外觀。
門外有個小揺椅~
尋晚食過既餐廳~炭燒黑毛豬
8點半出車, 出發去牛島既城山客運碼頭, 車程約8分鐘就到。
我地去買飛先~ 連人帶車上來回, 承惠56,900WON, 約$398
職員帶路, 順利上船啦, 見船就上, 無理到喺邊個碼頭落。HAHA
差不多開船啦, 9點鐘, 可以落車, 吹吓海風先~
上去甲板影吓相先~
無聊既時候就係影呢啲相~
JACK就要影到支韓國國旗飄揚, 捕左一陣~
船上自己自助, 冇人收錢既, 買啦買啦~!!
船上有兩層都有呢啲俾人休息既地方。要除鞋啦~!
坐左一陣, 影吓相, 有啲人就睇吓電視~
阿叔, 唔好意思, 唔係特登指住你架~
船程約15-20分鐘,就到左牛島啦, 我地上岸既地方係天津港, 於是去我地第一個景點進發。
牛島峰
事關老爸冇興趣行, 於是安置左佢喺一間咖啡店度嘆咖啡先~
呢度就係牛島峰啦, 似個牛頭嗎???
呢度好大風呢~!!!!
中間有俾人騎馬影相既地方。
呢度一望無際既草原, 十分開揚, 心情都舒暢啲, 係....有啲凍.....同好大風囉~
快快影相, 快快攪掂。
唔上到咁上啦, 回程啦。
濟州公仔幾攪笑~
10點零鐘, 去另一個地方進發啦, 就係東岸鯨窟。又係啲天然形成既石同黑砂既小海灣。
有啲旅客會JOIN啲快艇遊, 去外圍兜圈。
去到呢度, 大家一定要試既, 係呢間Jimmy's Natural IceCream
我地叫左牛島花生冰淇淋同柑橘冰淇淋, 都幾好味。
呢度可以俾你行落去個沙灘度。
我地就係坐喺呢度食雪糕。今日都幾多人喺度。
有位坐, 喺度食住風, 歎埋個雪糕先~
Coffee Shop 好開揚, 落地玻璃好正呢~
街邊有賣紀念品同食品既地方。見好多地方都賣緊呢支花生瑪格利米酒。
啲花生都唔平喎, 都要成6-70蚊港紙一包。
海女像~
又有另一間又係賣牛島花生雪糕。
吹呀吹~~~~~ 讓這風吹~~~~
咁都做到攝石人~大合照!
同海女像影張相, 話晒呢度都係海女之島~
好啦, 我地喺度逗留左冇耐, 11點半啦, 出發去牛島北部既烽火台同燈塔。
約10分鐘既車程, 到啦， 呢度好好用石堆成既矮牆, 喺路既兩旁, 好有特色。
而且啲路好窄, 我地既大車行, 真係要好靠司機既功力。
到啦, 雖然天空不是太晴朗, 總算有啲啲白雲。呢個就係個燈塔啦。
呢個就係烽火台啦, 嘩超級大風吖~
有個海螺可以俾人影相~
黎張大合照先~
烽火台上真係好大風吖, 人都差啲吹郁。
呢兩位攝石人又搶位啦~
嘩....你地班狂人............
好COLOURFUL既海螺~
巧遇呢兩位楂住單車環濟州遊既香港人。
走啦, 上車去第二度啦, 沿途見到蟹仔呢~
好客之道~ 禮尚往來~
我有蟹腳呢~
濟州石像~
12:15了, 我地到達了西濱白沙~
好靚吖~ 啲沙白色架~你睇個海啲顏色, 好靚吖~
好似有啲珊瑚喺裏面咁~
海女AGAIN~!
好啦, 我地出發去食LUNCH啦, 黎呢度, 一定要去呢間,
食漢拏山炒飯。
呢個狗仔PR, 好稱職, 一路帶路, 圍住我地帶到去餐廳既門口, 好得意。
裏面有分兩邊, 一邊係坐地台, 一邊係坐正常枱。我地揀坐枱~
時間啱啱好, 12點45分, VERY FIT 既 LUNCH TIME~
食漢拏山炒飯前, 先要叫個辣魷魚或辣豬肉, 我地就叫左一份兩溝~
好味呢~
好啦, 食完碟餸, 戲玉黎啦, 登登登登~~
專責WAITER幫我地整啦~ 好EXCITING!!!
用剩返既醬汁, 撈芝士, 紫菜, 加紅糙米飯, 撈呀撈.......
火山吖~~~~!!! 爆漿吖~~~~!!!! 熔岩吖~~~~!!!
佢好落力吖~!!! 服務超好~!!
YEAH!! 漢拏山炒飯大功告成。好味吖~!!!
食到AROUND 13:45啦, 出面下雨呢~~~~!!!
雨細啲, 我地要走啦, 門口貼滿鮑魚殼, 上面寫埋啲字, 呢度有筆提供。
我最鍾意留字架啦,
朋友們, 下次你地黎呢度食, 留意吓大門口既扶手位位置, 有我既留筆。
記住, 影埋俾我睇吓啦喎~~~
好啦, 回程啦, 呢度近下牛木桐港碼頭, 於是我地去呢個碼頭上船啦。
BYE BYE UDO!!!
上左船都不忘扮CHOK!!!! 我好專心研究緊地圖架~!!!
2點度, 上船等開船啦!
附上我地牛島既行程地圖概覽~
見時間尚早, 又怕明天天氣會變壞, 於是去埋個城山日出峰啦。碼頭過去, 好快。
呢度就係城山日出峰啦~
喺個水牌前留影先~
入場費, 2000WON一位, (約港幣$14)
呢度係由10萬年前海底火山爆發而形成的高聳巨岩，
其頂部有巨大的火山噴口。
原先雖為火山岩，後新陽海水浴場土地與島嶼間的沙子和碎石堆積成為陸地與其相連接。
2007年正式登錄成為世界自然遺產。
所以真係好值得一去, 我相信天氣好時, 更靚~
我地又遇到好得意既狗啦, 佢好悠閒咁喺度碌草地~
好舒服呢~ 好大風呢~
山上望落去,十分開揚
好, 陣間行落去望吓先~ 條樓梯.....都幾長吓喎~!
你慢慢等啦~!!
呢度下午13:30 同15:00 都會有海女表演。我地就MISS左啦, 太晏了,
都去睇吓佢賣啲咩新鮮海鮮啦!
一份30,000 WON, 即$210度, 算啦, 唔食住啦~
又一峭壁~
介紹呢個地形點形成既~
從火山口噴出既火山灰飄浮至慢慢堆積成...... 火山灰層, 啲黑砂都係啲碎屑~
好啦, 行完城山日出峰, 要走啦, 走之前,
去買支出名既HALLABONG柑橘汁飲, 同埋呢個波波回去。
又買左呢個磁石公仔, 又增添我屋企既收藏啦。
回程啦, 途經呢間CAFE, 今晚就光顧一下先~ 好靚吖個OUTLOOK!
頭先買既餅, 原來裏面係紅豆蓉。
17:00了, 回酒店歇一會, BOOK左餐廳18:30。
電視做緊容和呢~ 好似係「超人回來了」呢個節目。
好啦, 18:15去返餐廳啦, 間餐廳好得意, 好特別, 正!
睇MENU, YEAH, 有中文, 唔使驚。
我地點左份辛辣海鮮雜燴
皇帝餃子
海鮮蔥煎餅
生拌尾斑光鰓魚
同埋牛島花生米酒
個海鮮雜燴真係超辣, 但又好味喎~ 真係又愛又恨。
坐吓坐吓.......出面咩事呢????
嘩....收到警報......咩事??? 出面橫風橫雨.............
好啦, 8點鐘啦, 埋單, KIT送左兩老回酒店先~
今餐94,000WON, 即HK$ 658 , 咁又唔係好貴喎~
我同SISTER就飛奔去隔離間CAFE啦, 嘩, 裏面都好有FEEL。
有個向住大海既窗口位, 好正~!!!!
我地每人叫左杯野飲~ 偷閒了一會, 出面落住雨, 真係成個畫面都覺得好有FEEL
偽文青一下先~
HELLO!!!
玩吓 PANORAMA SELFIE
地板都好有心思架~
影影影...真係咁既環境, 影咩都咁有FEEL!
差到多9點啦, 佢地都要打烊了~ 臨行前, 唔好嘥左個景, 你估我喺度做咩???
就係為左影張「刑瞓著」既相~正~!!!
去搵宵夜先~ 去便利店買野食, 布甸就買唔到。
最後傾埋少少明天既日程如何, 開會完畢~!!!
最後我地買左啫哩食~~~ 作為今晚既甜品~!!!
完滿既一天完畢, 早抖~!! 今晚要執行李, 明天要搬家了~!!
今日大致行程地圖
沒有留言:
張貼留言